trobar un luec per un an

Ai lo nom de l'establiment segondari. Avans tot, me cal trobar un lotjament gaire luenh d'el. istòria de ren pérder de temps de tròp dins los taps sus lo camin de retorn.

Cal cercar un afit/ una locacion. Coma sempre, se fai dins l'urgença, mas cal totun se forçar a pilhar lo temps per trobar un bòn endrech. Dins la precipitacion, se pòl tombar sus tot e subretot quasi de ren per car. Per astre, conoisso una amiga que me pòl albergar a una ora d'aicí istòria d'aver una basa de replec se tròbo ren. Mas per astre, a la fin de la primiera jornaa de recèrca-visita, sembla que trobessiam facilament -contrariament al gus de la primiera agença de locacion que vegueriam-. D'efièch, nos diguèt : "Sabètz, aicí es dur de trobar una locacion ! I es gaire de que causir!". Que mensoneguier ! Just al ras de la locacion que prepausèt, una autra. E dins lo vilatge a costat, ancara, e ancara. De que causir al final quitament.

Va ben. Al final, fasèm lèu lèu un dorsier (cal amolonar un fais de documents, que paciéncia) per una locacion que nos sembla la melhora, e esperam la respònsa.

3 jorn mai, avèm l'acòrdi e ja l'apontament per far los papiers, aver l'estat dals luecs entrant, e pi las claus.

Amainatjar l'interior lèu amb de mòbles de fortuna o recuperats un pauc pertot dins la familha.

E òc, avèm ja de despensas avans de tocar lo primier salari. E serà tendut financiarament : aquest an, la frema pòl ren quitar son trabalh e donca se trobam a aver doas locacions sus l'esquina... Coma ditz la cançon "tant que farèm aital se comprarèm pas de bòria, tant que farèm aital se comprarèm pas d'ostal...".